Незалежны Рэспубліканскі Саюз Моладзі › Артыкулы › Лявон Вольскі. Куплеты і прыпевы Лявон Вольскі. Куплеты і прыпевыПадаецца, што Вольскі не адчувае Руху ў беларускай музыцы, ад таго і імкнецца пакрыць усе жанры — ад якаснай музычнай альтэрнатывы ў ZET, музыкі пратэсту ў N.R.M., праз «рэстарацыйна‑карпаратыўную» «Крамбамбулю» і ажно да шансону. Альбом, які вырашана было распаўсюджваць выключна празь сеціва, уяўляе з сябе набор музычна‑гумарыстычных нумараў з элементамі вострасацыяльнага сьцёбу, зробленых ў наўмысна банальнай аранжыроўцы. Героі — поп‑сьпевакі, народныя дэпутаты ды сцэцназаўцы, якія паказваюцца ў карыкатурным выглядзе. «Не пераключай праграму, падла, дурань, п…дар, сволач!», ‑‑ пяе Лявон у песьні пра «Палітычнага камэнтатара». Але ці трэба ўступаць у завочныя дэбаты, хай сабе і неўсур’ёз, з тымі прыслугачамі? Кусаць пазногці ад злосьці пры праглядзе «бэтэшных» тэлесюжэтаў, а потым гэтак жа зьедліва пацяшацца зь іхніх аўтараў? Гульня такая выглядае пазбаўленай усялякага сэнсу. І калі ваш выбар — ігнараваць, не глядзець, не зважаць, не заганяцца на тых дробязях, якія апявае Вольскі ў сваім сольным альбоме, то і альбом гэты слухаць зусім неабавязкова. Не паказьнік, але факт: сур’ёзны твор «Загінулым паэтам прысьвячаецца» у сумесным выкананьні бярозаўскага гурта B:N і Вольскага мае на сайце «Тузін Гітоў» куды большы посьпех, чым жартаўліва‑кплівая «Эўравізія» з «Куплетаў і прыпеваў». Сапраўды, якая там розьніца, хто паедзе на «Эўравізію», нам трэба думаць пра Сваё. |
© 2005–2009 НРсМ. Рухавік, падтрымка: Slaver. Дызайн Rohač. |