Сольны Лявон Вольскі на «Тузіне Гітоў»

Лявон Вольскі зьняў трэш-відэа да песьні «Эўравізія» з будучага сольнага альбома, рэліз якога адбудзецца празь некалькі тыдняў. З 1 па 8 красавіка убачыць кліп можна толькі на партале TUT.BY. Новая песьня зьдзівіць і зьбянтэжыць нават сталых прыхільнікаў «Крамбамбулі» – гэта 100-працэнтнае мінімалістычнае трэш-дыска, запісанае з дапамогай старэнькага сынтэзатара Kurzweil. Тэкст кампазыцыі цалкам адпавядае яе аранжыроўцы: «А я спяваю так афігіцельна, што я паеду на „Эўравізію“». Новая песьня Лявона Вольскага ў новым туры «Тузіна Гітоў».

Лявон ВольскіЛявон Вольскі сьцьвярджае, што песьня прыйшла да яго ў сьне. «Мне прымроілася, што я прымаю ўдзел у адборышчы на „Эўравізію“. У патасным белым гарнітуры, з напаўаголенымі танцоркамі і сьпяваю нешта павольнае, у манеры Мікалая Баскава, а яны каўбасяцца, як на рэйве, – распавядае сьпявак. – Я прачнуўся сярод ночы ад уласнага сьмеху!»

Здымала кліп брыгада маладых менскіх аніматараў на чале з рэжысэрам Яўгенам Новашам, працы якога трапілі да Вольскага праз знаёмых. «Мне падалося, што іх чорны гумар і трэш-манера вельмі пасуюць да гэтага матэрыялу, – тлумачыць Лявон. – Асабліва ўсе гэтыя псэўдажахі з таматным соўсам».

Рэжысэр кліпу Яўген Новаш прызнае, што базісам для кліпу сталі ўласныя эмоцыі ад штогадовага гармідару вакол «Эўравізіі». «Ведаеце, калі я чую пра ўсе гэтыя скандалы з адборышчамі ў нас і ў іншых краінах, мне часам здаецца, што там сапраўдныя бойкі ідуць, толькі іх ніхто не паказвае. Мы паспрабавалі павыдумляць на гэтую тэму, – гаворыць Яўген. – Наогул, мне здаецца, што пра „Эўравізію“ можна поўнамэтражны фільм жахаў здымаць. Будзе круцей за „Крык“!»

Апублікавана 03.04.2008 by Андрэй.