Гурт N.R.M. выклаў рарытэтную песню, каб дапамагчы сабраць грошы для Мішы Ларына

Гурт N. R. M. выклаў на сайце serca.tut.by для вольнага пампавання рарытэтную песню "13". Мэта акцыі - дапамагчы сабраць 350 тысяч еўра, патрэбных Мішы Ларыну, каб зрабіць аперацыю па перасадцы сэрца. Зараз на яго рахунку толькі дзясятая частка неабходных сродкаў. Грошы можна пералічыць праз банк і Webmoney.

Песня "13" мае цікавую гісторыю, якая пачалася больш за 10 год таму. "Міхал Анемпадыстаў прапанаваў пасля "Народнага альбому" зрабіць альбом марскіх песень і даў мне паслухаць нейкіх кельтскіх спеваў, - распавядае Лявон Вольскі. - Пад іх уплывам я напісаў гэткую песню-стылізацыю. "Марскі праект" так і не адбыўся, а песня на студыйныя альбомы N. R. M. не патрапіла. Мы яе выканалі на акустыцы 10 гадоў таму і зноў прыгадалі яе толькі на акустыцы ў гэтым траўні. Адтуль і запіс".

Удзельнікі гурта спадзяюцца, што іх песня дапаможа сабраць грошы для Мішы Ларына. "Мýзыка - гэта вялікая сіла, якая павінна дапамагаць рабіць наш свет лепшым у глабальных і часам нават прыватных справах гэткага кшталту, - лічыць гітарыст гурта Піт Паўлаў. - Мы спадзяемся, што ўсё атрымаецца і заклікаем усіх хто можа, дапамагчы Мішы".

Як пералічыць грошы

Кашалькі Webmoney. У доларах ЗША - Z622038393970, еўра - E286206891870, расійскіх рублях R695931672751, беларускіх рублях - B411817094794.

У любым аддзяленні “Беларусбанка” - трэба толькі мець рэквізіты яго рахунка. Квіток запаўняць не трэба, пашпарт не патрэбен. У беларускіх рублях: філіял 511 ААТ "АСБ Беларусбанк", Код 815 УНП 100349858, разліковы рахунак 3819382103561, для пералічэння на рахунак №01000019 для Ларына Міхаіла.

Валютныя рахункі, інфармацыя для банкаўскіх пералічэнняў з-за мяжы, а таксама падрабязна пра Мішу Ларына - на сайце serca.tut.by.

Апублікавана 05.08.2008 by Андрэй.