Незалежны Рэспубліканскі Саюз Моладзі › Навіны › Панк на Танка Панк на ТанкаДаўгачаканая прэзэнтацыя альбому Лявона Вольскага «Белая яблыня грому» на вершы беларускіх паэтычных клясікаў пераўтварылася ў сапраўдны справаздачна-паказальны канцэрт «Лепшае» з песьнямі з усіх праектаў, створаных музыкаю за апошні час. У другім аддзяленьні абяцаліся новымі сольнымі песьнямі ды старымі гітамі з адноўленай «Крамбамбуляй» напрыканцы. Стары склад, акрамя духавой сэкцыі, зьмяніўся амаль цалкам новымі музыкамі: на бас-гітары граў Алесь Мышкевiч, басіст гурта «Без білета», на бубнах - Сяржук Штэндэр, на гітары – Павал Трацьцяк, які таксама грае ў J:морс, на другой гітары Алег Гарус. Гэтыя ж музыкі гралі і ў першым аддзяленньні «Белая яблыня грому». Вольскі да таго ж засьпяваў некалькі песень зь вядомымі гасьцямі Ўладзімерам Пугачам і Ганнай Хітрык. “У бліжэйшых плянах калектыву - Крамбамбуля Народная”, - падзяліўся навіною Лявон Вольскі, то бок стварэньне праграмы на народныя песьні. Сапраўднасьць гэтай ідэі музыкі падцьвердзілі вясёлай і танцавальнай песьняй на народныя словы «Як служыў жа я ў пана», якая выклікала вельмі пазытыўную рэакцыю ў залі. На канцэрце прысутнічала шмат знаных гасьцей. Аднаму зь іх, амбасадару Ірляндыі ў Літве і Беларусі Доналу Дэнэму, Лявон Вольскі прысьвяціў з нагоды Дня Сьвятога Патрыка песьню ў ірляндскай стылістыцы «Сіні нос», а гледачам пажадаў: “Сьвяткуйце пазытыўна Дзень Волі, як сьвяткуюць Дзень Сьвятога Патрыка”. Дарэмнымі былі словы Вольскага “Бісу ня будзе” і апошняя ў праграме канцэрту песьня «Госьці», якая прымусіла ўзьняцца ўсе тры паверхі тэатру імя Янкі Купалы і сьпяваць разам. Гледачы вырашылі - біс будзе, таму яшчэ два гіты «Старыя хіпаны» і «Абсэнт» даказалі недарэмнасьць выкрыкаў гледачоў “Брава, маэстра!” Павал Белавус, ТГ |
© 2005–2009 НРсМ. Рухавік, падтрымка: Slaver. Дызайн Rohač. |