«Zet» i «IQ48»: разам весялей!

ZET 14 траўня а 18-й гадзіне ў клюбе «Арэна» адбудзецца вялікі супольны канцэрт двух вядомых гуртоў Zet i IQ48. Zetаўцы нячаста радуюць сваімі выступамі сталічную ды і ўвогуле айчынную публіку, паколькі зараз упарта працуюць у сонечнай Вэнэсуэле ў складзе беларускага будатраду, вучаць лацінаамэрыканцаў правільна вырошчваць збожжа і лён, дапамагаюць у будаўніцтве аграгарадкоў.

Паколькі вэнэсуэльскае надвор'е цёплае круглы год, то ня так лёгка хлопцам вырвацца ў адпачынак на Радзіму, завітваюць яны ў сінявокую літаральна на некалькі дзён. На шчасьце, гэтым разам атрымалася дамовіцца з музыкамі адыграць эксклюзыўны канцэрт у горадзе-героі Менску. Гурт абяцае пацешыць прыхільнікаў гітамі з абодвух альбомаў ды падзяліцца ўражаньнямі, атрыманымі падчас знаходжаньня ў далёкіх цёплых краях...

Гурт IQ48 імкліва і заслужана ўвайшоў у вышэйшы эшалён беларускай альтэрнатыўнай музыкі. «Здаровыя лосі» пэрыядычна ўзрываюць танцпляцы розных гарадоў. Яны даюць канцэрты, поўныя шалёнай энэргетыкі і пазытыву. Зараз упарта занятыя запісам новага альбому, але вырашылі адарвацца ад студыйнай працы дзеля гэтага выступу.

Разаграваць алдовых байцоў беларускага рок-фронту будзе малады, але таленавіты ска-панк гурт the naиskaсок, які здабыў ужо станоўчую рэпутацыю ў менскіх альтэрнатыўных колах.

Такім чынам, раім не прапусьціць спатканьне зь любімымі музычнымі калектывамі і наведаць 14 траўня клюб «Арэна».
Даведкі і замова квіткоў праз тэлефон: 674-97-61.
Кошт: 12000 - загадзя, 15000 - у дзень канцэрту.

Тузін гітоў.

Апублікавана 11.05.2007 by Андрэй. Абмяркаваць на форуме