Незалежны Рэспубліканскі Саюз Моладзі › Артыкулы › Рокавая пятніца: у адзін вечар N.R.M. і Neuro Dubel зладзілі сольныя канцэрты Рокавая пятніца: у адзін вечар N.R.M. і Neuro Dubel зладзілі сольныя канцэртыХоць гэта пятніца й была 14 лістапада, а не «пятніца 13-га», «рокавай пятніцай» яе можна назваць дакладна. У адзін вечар у розных менскіх клюбах з сольнымі канцэртамі выступілі N.R.M. і Neuro Dubel. Спэцыфіка беларускіх клюбаў і моладзевага клюбнага жыцьця калі не выключае панятак «клюбіцца», то, прынамсі, сустракаецца ня часта. Але мы ў гэты вечар вырашылі паклюбіцца — трапіць і на N.R.M. і на Neuro Dubel. На падыходзе да Night Star, дзе пачынаўся канцэрт N.R.M., убачаная чарга з прыхільнікаў на дзесяткі мэтраў уражвала. Падобная карціна была год таму, на прэзэнтацыі новага дыску N.R.M. «06» у «Фартуне». Праціснуўшыся ўнутр, дзе клюб ужо быў напоўніцу набіты гледачамі, слаба верылася, што чарга з вуліцы можа ўлезьці ў клюб. І я, шчыра кажучы, ня ведаю, ці ўсе патрапілі. Прынамсі адзін чалавек, які ішоў з намі, так і не патрапіў — квіткоў ужо ня было нідзе, а чарга пакідала хіба што смутны спадзеў, што пад канец канцэрту можна будзе ўлезьці. NRM На канцэртах N.R.M. заўжды ўражваюся, адкуль бяруцца новыя прыхільнікі-падлеткі — гэта ж ня тая музыка, якую лёгка можна пачуць на радыё ці тэлебачаньні. Некалькі дарослых бізнэсоўцаў з куфлямі піва на бары, рознаўзроставыя кампаніі за столікамі, і шчыльны натоўп пад сцэнай, гатовы ўсім кагалам заціснуць калі не музыкаў, то тых, хто наіўна прашыўся ў першы шэраг... Заля Night Star і наперш танц-пляцоўка хутчэй прызначаная для дыскатэкаў і рытмічных танцаў, чым для рокавых скокаў. Таму падлога вібравала ўжо з першай песьні. І, як высьветліцца потым, рок-музыкі яна ня вытрымала. Пабыўшы гадзіну на N.R.M., мы зьніклі «клюбіцца» далей — у Da-club на Neuro Dubel. Знаёмыя на энэрэме па-шчыраму зайздросьцілі, але нават самыя авантурныя не адважваліся паехаць разам — спадзеву, што змогуць улезьці ў клюб на ND, было мала. Чарговая песьня, усе ў натоўп пад сцэну, а я так і не пасьпела сказаць знаёмым, што піва скончылася толькі на адным бары — каля сцэны яшчэ прадаецца. На выхадзе з Night Star ужо ня было нікога — альбо ўсе трапілі ў клюб альбо пайшлі дадому, нават гардэроб яшчэ быў зачынены, а ахоўнікі няўпэўнена перапытвалі, ці сапраўды мы зьяжджаем «ужо зусім». Пятнаццаць хвілінаў на даезд — і мы ўвальваемся ў шумную атмасфэру Da-club. Neuro Dubel Публіка Neuro Dubel адрозьніваецца. Такі настрой «дарослых панкаў», старых знаёмых і нейкай падкупляльнай дарослай непасрэднасьці. Da-club — маленькі, і ND там упершыню. Пад высокай сцэнай слэмяцца хлопцы, нават рызыкоўныя дзяўчаты кідаюцца ў гушчу падзеяў: ці то ад таго, што клюб маленькі, і вось яны — рок-каралі — зусім побач, ці то ад спакушальнай высокай сцэны, на якую зручна залазіць і скокаць на рукі. Neuro Dubel На такіх канцэртах заўжды думаеш, ну чаму клюб такі маленькі? У прыбіральні агульная чарга, палілка й самае ціхае месца для размоваў. Кожны другі перапытвае, як там сёньня на N.R.M. Але гукі песьні «Ничего на свете больше нету!» усіх зганяюць пад сцэну. А 22:00 абодва канцэрты ўжо скончаныя. Едзем на агульную афтэпаці, дзе зьбіраюцца і тыя, хто быў на N.R.M., і тыя, хто на Neuro Dubel. Гадзіна — і ўсе ўжо ў курсе, як прайшлі абодва канцэрты. І што на N.R.M. правалілася танц-падлога, і што дзяўчыне нагу зашчыміла і яе адвезьлі ў шпіталь (энэрэмаўцы на наступны дзень: «Зараз зь ёй ужо ўсё ў парадку»), і што канцэрт раней спынілі, і што на Neuro Dubel быў клюб маленькі, але музыкаў змусілі на «біс» засьпяваць яшчэ ці не пяць песьняў. І што, калі б і «Крама» ў гэты вечар зладзіла свой сольнік, як плянавала раней, то і на іх клюб таксама быў бы поўны, а наша пасьляканцэртная кампанія была б яшчэ шырэйшая. |
© 2005–2009 НРсМ. Рухавік, падтрымка: Slaver. Дызайн Rohač. |